Bugun Mass-media fondi Vasiylik kengashi raisi Nozima Davletova va Fond direktori Akramjon Fozilov Yevropada xavfsizlik va hamkorlik tashkilotining OAV erkinligi bo‘yicha vakili Tereza Ribeyro boshchiligidagi delegatsiya bilan uchrashuv o‘tkazdi.

Axborot va ommaviy kommunikatsiyalar agentligi tomonidan ishlab chiqilayotgan Axborot kodeksi loyihasi asosiy muhokama mavzusi bo‘ldi. Kodeksning amaliy hujjatga aylanishi uchun amalga oshirilishi lozim bo‘lgan chora-tadbirlar tahlil qilindi.

Tomonlar, shuningdek, media sohasidagi so‘nggi o‘zgarishlarni muhokama qildilar hamda O‘zbekistonda jurnalistlarning kasbiy faoliyatidagi to‘siqlarning oldini olish bilan bog‘liq masalalarga to‘xtaldilar.

Bundan tashqari, uchrashuvda 17-noyabr kuni bo‘lib o‘tishi rejalashtirilgan hamkorlikdagi gender-nozik jurnalistikani rivojlantirish masalalariga oid davra suhbatiga e’tibor qaratildi.