Korporativ kommunikatsiyalar bo‘yicha mutaxassislar va milliy ommaviy axborot vositalari jurnalistlari EUROUZ va Mass-media fondi tomonidan tashkil etilgan biznes-nonushtada tajriba almashib, ehtimoliy hamkorlik rejalarini muhokama qildilar.
2024-yil 20-dekabr kuni Beeline Uzbekistan rahbarligidagi EUROUZning Jamoatchilik bilan aloqalar va strategik kommunikatsiyalar qo‘mitasi Milliy mass-mediani rivojlantirish va qo‘llab-quvvatlash jamoat fondi bilan hamkorlikda korporativ kommunikatsiyalar bo‘yicha mutaxassislar va jurnalistlar uchun biznes-nonushta uyushtirdi. Tadbirda 30 dan ortiq mutaxassis ishtirok etdi.
Uchrashuvning asosiy mavzusi - "O‘zbekiston e’tibor markazida: OAV holati va strategik yo‘nalishlar" edi. Jurnalistlar, davlat va nodavlat sektorlarining OAV bilan ishlash bo‘limi rahbarlari, mass-media sohasidagi milliy va xorijiy mutaxassislar hamda tadbirkorlik vakillari korporativ mavzularni yoritish va hamkorlikning istiqbolli shakllarini muhokama qildilar.
Tadbirning dolzarbligi shundaki, bunday formatlar yanada yaqin hamkorlikni yo‘lga qo‘yish, mavjud aloqalarni mustahkamlash va aniq masalalarni batafsil muhokama qilish imkonini beradi. Ushbu holatda xususiy kompaniyalar va OAV vakillari orqali reklama beruvchilarga bevosita muloqot qilish imkoniyati yaratildi.
Mass-media fondi Vasiylik kengashi raisi Akramjon Fozilov o‘z nutqida mahalliy va xalqaro ommaviy axborot vositalarining o‘zaro hamkorligi muhimligini ta’kidladi:
"Mamlakatimiz zamonaviy, ochiq va jadal rivojlanayotgan davlat sifatida qabul qilinsa, bu yangi imkoniyatlarni jalb qiladi va iqtisodiy o‘sishga hissa qo‘shadi. Xalqaro ommaviy axborot vositalari bilan ochiq muloqot va tajriba almashish esa chaqiriqlarni taraqqiyot uchun imkoniyatlarga aylantirishga yordam beradi."
Tadbir doirasida Financial Times jurnalisti Nastasya Astrashevskayaning onlayn ma’ruzasi bo‘lib o‘tdi. U xalqaro ommaviy axborot vositalarida korporativ mavzularni yoritish bo‘yicha tajribada sinalgan va e’tirof etilgan amaliyotlar hamda media rivojlanishining jahon tendensiyalari haqida so‘zlab berdi.
Shuningdek, Beeline Uzbekistan vakillari 2025-yil may oyida Toshkentda bo‘lib o‘tadigan GSMA M360 Global sammiti haqida ma’lumot berishdi.
Tadbir netvorking sessiyalari bilan yakunlandi, unda ishtirokchilar g‘oyalar almashib, qo‘shma loyihalarni muhokama qilishdi.
