Mass-media fondi texnologiyalar yordamida amalga oshiriluvchi gender asosidagi zo‘ravonlikka (TFGBV) qarshi kurash mavzusiga bag‘ishlangan davra suhbati o‘tkazdi
2024-yil 18-iyul kuni Toshkent shahrida “Raqamli xavfsizlikni kuchaytirish: texnologiyalar yordamida gender asosidagi zo‘ravonlikka qarshi kurashish” mavzusida davra suhbati bo‘lib o‘tdi.
Mazkur tadbir Milliy mass-mediani qo‘llab-quvvatlash va rivojlantirish jamoat fondi hamda “Search for Common Ground” xalqaro nodavlat tashkiloti hamkorligida SHE LEADS loyihasi doirasida tashkil etildi.
SHE LEADS loyihasi raqamli makonda ayollar va qizlar uchun xavfsiz muhit yaratishga qaratilgan bo‘lib, onlayn hamjamiyatlar uchun maxsus raqamli styuardlar (moderatorlar)ni tayyorlashni maqsad qilgan. Ushbu moderatorlar zamonaviy texnologiyalar orqali ayollarga nisbatan sodir etilayotgan zo‘ravonlik (TFGBV) holatlarining oldini olish, himoya qilish va bunday holatlarga to‘g‘ri javob berish bo‘yicha samarali usullarni o‘rganishadi.
Davra suhbatida davlat idoralari, ommaviy axborot vositalari, ilmiy doiralar va fuqarolik jamiyati vakillari ishtirok etdi. Tadbirning asosiy maqsadi O‘zbekiston va butun Markaziy Osiyoda ayollar va qizlarning internet xavfsizligi masalalari haqida jamiyatni xabardor qilish va mavjud muammolarni hal qilish yo‘llarini muhokama qilishdan iborat edi.
Ishtirokchilar internet platformalarida texnologiya orqali sodir etiladigan jinsiy zo‘ravonlik (TFGBV) turlarini batafsil ko‘rib chiqishdi. Bunda alohida e’tibor onlayn shilqimlik, kiber ta’qib, jinsiy zo‘ravonlik va shaxsiy tasvirlarni ruxsatsiz tarqatish kabi dolzarb misollarga qaratib o‘tildi. Mutaxassislarning ta’kidlashicha, bunday holatlar ayollar va qizlarning xavfsizligi hamda farovonligiga jiddiy tahdid soladi. Ushbu zararli xatti-harakatlar mavjud gender tengsizlikni yanada kuchaytiradi va ayollarning raqamli makonda to‘laqonli ishtirok etishiga to‘sqinlik qiladi.
Muhokama davomida ushbu muammoni hal qilish uchun turli mamlakatlardagi mavjud amaliyotlarni sinchkovlik bilan o‘rganish va xavfsiz raqamli makonni yaratish hamda barcha foydalanuvchilar uchun teng imkoniyatlarni ta’minlash uchun barcha manfaatdor tomonlarning sa’y-harakatlarini birlashtirish zarurligi ta’kidlandi.
